|
|
Edukasyon ng kabataan para guminhawa ang buhay, unang-una sa mga
programa ni PGMA |
|
Nakatuon ang administrasyon ng Pangulong Gloria
Macapagal-Arroyo sa edukasyon na hagdan sa higit na maginhawang buhay na
pakikinabangan ng mga susunod na saling-lahi.
Ito ang buod ng mensahe ng Pangulo na binasa ni Executive Secretary Eduardo
Ermita sa parangal sa 2009 Ten Outstanding Students ng Pilipinas (TOSP)
kaninang umaga sa Rizal Hall ng Malakanyang.
Sinabi sa kalatas ng Pangulo na inuuna ng administrasyon niya ang paglinang
sa kaalaman ng kabataan na isa sa pinakamainam na pamumuhunang dapat gawin
ng alinmang bansa.
Binigyang diin ng Pangulo na idinaraan sa Kagawaran ng Edukasyon ang mga
programa ng iskolarsip at jobs expo para sa hanapbuhay at iba pang
pagkakataon ng libu-libong kabataan taun-tan sa mga kole-hiyo at pamantasan
ng gobyerno, gayundin sa Technical Education and Skills Development
Authority (TESDA).
Binanggit ng Pangulo na ang “One Town, One Scholar program” niya ay tiyak na
magiging daan upang isa man lamang nagtapos sa mataas na paaralan mula sa
1,500 bayan sa buong bansa, lalo na ang walang pambayad sa matrikula, ay
makapag-aaral sa kolehiyo simula noong Hunyo ng taong ito.
Naglaan ng P46 milyon ang Commission on Higher Education mula sa badyet nito
para ipatupad ang programang nabanggit mula Hunyo, 2009 at sa susunod na mga
taon, ang badyet para sa iskolar ng bayan ay isasama na sa taunang badyet ng
CHED.
Nakalagda sa programang “One Town, One Scholar” ang League of Municipalities
of the Philippines (LMP) na nagpahayag ng suporta sa CHED paramaragdagan
pang bilang ng iskolar ng bayan salig sa kaka-yahan ng munisipalidad.
Sinabi ng Pangulo na ang mga programang ito ay magbibigay ng sapat na
pagkakataon sa mga kabataan ng ating bansa para sa higit na magandang buhay
sa hinaharap.
Pagkabasa ng mensahe ng Pangulo, ipinamahagi ni Ermita ang tropeo ng 2009
TOSP na pinili mula sa 33 finalists.
Ang 2009 TOSP ay sina: Roger Flores ng Philippine Military Academy (PMA);
Miguel Antonio Garcia (University of San Carlos, Lungsod ng Sebu); Aidel
Paul Belamide (UP Los Banos); Ann Crusit (University of Bohol); Paul John
Gesta (University of Cebu); Adrian Claro Mundin (Ateneo de Manila
University); Stacy Danika Alcantara (Silliman University); Stephen Alexeus
Baltazar (University of San Carlos); Nicole Marie Villarojo (De la Salle
University) at Carlos Gerogain, Jr. (West Negros University).
Katuwang ni Ermita sa pamamahagi ng gawad si CHED Chairman Emmanuel Angeles,
RFM Foundation Chairman Jose Ma. Concepcion III, Jose “JoeCon” Concepcion at
Alfredo Ramos, pangulo ng National Book Store.
Taong 1961 nang simulan ang paghahanap sa TOSP sa buong bansa. |
TOP |
|
|
Ipanalangin sa Palasyo ang paggaling ni Tita Cory |
|
Kaisa ang Malakanyang ng buong bansa sa
pagdalanging gumaling ang dating Pangulong Corazon C. Aquino sa karamdamang
colon cancer at bigyan ng lakas at tatag ng kalooban ang pamilya nito sa mga
sandali ng matinding pagsubok na ito.
Sinabi ni Deputy Spokesperson Dr. Anthony Golez sa mga reporter sa
Malakanyang na nang mabalitaan ng Palasyo ang kalagayan ng dating Pangulo,
nagkaroon ng isang minutong ‘silent prayer’ para kay Gng. Aquino ang mga
pinuno at kawani ng Malakanyang.
Si Gng. Aquino ay naoperahan dahil sa sakit na ‘colon cancer’. Isinugod siya
sa Makati Medical Center kamakailan dahil nawalan ng ganang kumain at
nakaratay pa rin siya sa nasabing ospital.
Idinugtong ni Golez na hindi niya alam kung may pamisang nakatakda para sa
dating Pangulo.
Si Gng. Aquino ang namuno sa bansa matapos mapatalsik ang noon ay Pangulong
Ferdinand E. Marcos. Pinamunuan niya ang ‘revolutionary government’
pagkaraan ng EDSA People Power 1 at bumuo ng lupon na bumalangkas sa
Kostitusyon ng 1987.
Nanungkulan ang Pangulong Aquino hanggang Hunyo 30, 1992 matapos mahalal ang
Pangulong Fidel V. Ramos. |
TOP |
|
|
|
|
|
